മുമ്പൊരു ലോറി സമരത്തിന് പച്ചക്കറി കേറ്റാൻ വേണ്ടി മൈസൂരേക്ക് പോയിരുന്നു
കൂടെ എന്നും വരാറുള്ള വാഴയില കച്ചോടക്കാരനായ ഞങ്ങളെല്ലാം ഇലവാസു എന്ന് വിളിക്കുന്ന വാസുവേട്ടനും
കല്ലേറും കാറ്റൊഴിക്കലൊക്കെ ഉണ്ടാകാൻ സാധ്യതയുള്ളത് കൊണ്ട് തന്നെ പല പല ഊടുവഴികളിലൂടെയാണ് മൈസൂർ മാർക്കറ്റിലേക്ക് കേറിപ്പറ്റിയത്
ലോഡ് കേറ്റിക്കെട്ടി മാർക്കറ്റിൽ നിന്നിറങ്ങി ഒരു കിലോമീറ്ററോടിയില്ല മനസ്സിൽ ഭയപ്പെട്ടത് പോലെ അത് സംഭവിച്ചു ..!
ഒരു കൂട്ടമാർക്കാർ ലോറി തടയുന്നു ,,,
എന്നെപ്പോലെ എത്തിയ കുറച്ചു വണ്ടികൾ ഓൾ റെഡി തടഞ്ഞു നിർത്തിയിട്ടുണ്ട് എന്റെ മുന്നിൽ
ഭാഗ്യത്തിന് ആരും അക്രമാസക്തരല്ല
എല്ലാരോടും ഇടതുഭാഗത്തുള്ള ഗ്രൗണ്ടിൽ കേറ്റയിടാൻ പറഞ്ഞു
"ആരും പോകണ്ട ഇവിടെ കിടക്കട്ടെ"
എന്ന ഒരു ഡയലോങ്ങ് മാത്രമേ അവര് പറയുന്നുള്ളൂ
പലരും പലതും പറഞ്ഞ് കാല് പിടിച്ചു നോക്കുന്നുണ്ട് .......
പക്ഷേ നോ രക്ഷ''
എങ്ങനെ രക്ഷപ്പെടും എന്നോർത്തിരിക്കുമ്പോഴാണ്
അവരുടെ കൂട്ടത്തിലെ നേതാവ് എന്ന് തോന്നിയ ഒരാളെ ഞാൻ ശ്രദ്ധിച്ചത്
അയാളുടെ നെറ്റിയിലെ നീണ്ട കുറിയും കയ്യിലെ ചരടുകളും അയാളൊരു ഈശ്വര ഭക്തനാണെന്നെനിക്ക് തോന്നി
കൂടെയുള്ള വാസുവേട്ടനോട് ഞാൻ പറഞ്ഞു
വാസുവേട്ടാ നിങ്ങളുടെ വാഴയില കെട്ടുകൾ കാണിച്ചു കൊണ്ട് ഞാനൊരു ശ്രമം നടത്തി നോക്കട്ടെ
എന്നും പറഞ്ഞ് വണ്ടിയിൽ നിന്നറങ്ങി അ നേതാവിന്റെ അടുത്തേക്ക് ഞാൻ നടന്നു.
അറിയാവുന്ന കന്നഡ ഭാഷയിൽ ഞാൻ പറയാൻ തുടങ്ങി
സാറെ.. ലോറി സമരമാണെന്നറിഞ്ഞിട്ടും ഞാൻ വന്നത് അമ്പത്തിലേക്കുള്ള വാഴയില കേറ്റേണ്ടത് കൊണ്ട് മാത്രമാണ് നാളെ അവിട അന്ന ദാനമാ .. ഇല അവിടെ എത്തിയില്ലെങ്കിൽ ആകെ പ്രശ്നമാകും
കർണാടകയിലുള്ളവർക്ക് പോലും അറിയാവുന്ന കേരളത്തിലെ ഒരു പ്രശസ്ത അമ്പലത്തിന്റെ പേരും പറഞ്ഞ് ഞാനിത് പറഞ്ഞപ്പോൾ കേൾക്കേണ്ട താമസം പിന്നിൽ നിന്ന് വരുന്ന വണ്ടികളൊക്കെ കൈ കൊണ്ട് തടഞ്ഞു നിർത്തി എന്നോട് വണ്ടി
റിവേൾസെടുക്കാൻ പറഞ്ഞു
"ഓഗപ്പാ നീനു ജൽദി ഓഗു"
എന്നും പറഞ്ഞ് ബാക്കിയുള്ള എല്ലാ വണ്ടികളും അവിടെ നിർത്തിയിട്ടിരിക്കെ തന്നെ ഞങ്ങളെ പെട്ടന്ന് പോകാൻ അനുവദിച്ചു
ഒരു വിശ്വാസിയുടെ വിശ്വാസത്തെ ചൂഷണം ചേയ്യേണ്ടി വന്നതിലുള്ള വല്ലാത്തവേദന മനസ്സിലുണ്ടെങ്കിലും സ്വയം രക്ഷക്ക് വേണ്ടിയല്ലേ എന്നോർത്ത് ഞാനും വാസുവേട്ടനും ആ പച്ചക്കറി ലോഡുമായി കേരളം ലക്ഷ്യമാക്കി കുതിച്ചു .....
