ദൂരദര്ശനില് ഞായറായ്ച്ച നാല് മണിക്ക് വരുന്ന സിനിമകള് മാത്രം കണ്ട് ശീലമുള്ള എന്നോട് ഒരു ദിവസം ഇക്കാക്ക വന്ന് ചോദിച്ചു ....
മനേ മനേ ഇഞ്ഞ് പോരുന്നോ എന്റൊടി ഒരു സലത്ത്
ഉമ്മാനോടും ഉപ്പാനോടോന്നും പറേണ്ട ...
കേനാലുമ്മല് ബോള് കളി കാണ്വോന് പോനാന്ന് പറഞ്ഞാ മയി
ഇഞ്ഞ് ഏട്യാ പോനെന്ന് പറ എന്നാ ഞാന് പോര ....
മൊകേരി സിനിമ കാണ്വോന് പോന്നാ ....ഇഞ്ഞും പോരി
ഉമ്മോ ഞാനില്ല ,,ടാക്കീസില് പോയി സിനിമ കാണല് ഹറാമാ
ഇല്ലാനെ ഇത് ഇമ്മള്യാളെ കഥയാ .. മമ്മൂട്ടീന്റെ 1921
ഇത് കണ്ടാല് ഹറാമൊന്നൂല്ല
ടിക്കറ്റെല്ലം ഞാനെടുത്യേരും
എന്റെരുത്ത് ഇന്നല ചപ്പ് വിറ്റ പൈശേണ്ട്
ഇഞ്ഞ് പോരുന്നെ ബേം ബാ ....
പിന്ന ഞാനൊന്നും ആലോചിച്ചില്ല ..
വാതിലില് തൂങ്ങി കിടന്ന കുപ്പായവും എടുത്ത്
അതിട്ടോണ്ട് ഓടുന്നതിനിടയില് ഞങ്ങള് രണ്ട് പേരും ഒരേ സ്വരത്തില് വിളിച്ചു പറഞ്ഞു ..
ഉമ്മാ ഉമ്മാ ഞാള് ബോള് കളി കാണ്വോന് പോയിറ്റ് ബെരുന്നെ .
ബെഗേങ്ങ് പോരണേ മക്കളെ ...
എന്ന് ഉമ്മ വിളിച്ചു പറയുന്നത് ഓടുന്ന ഓട്ടത്തിനിടയില് ഞങ്ങള് ചെറുതായി കേള്ക്കുന്നുണ്ടായിരുന്നു
ആ ഓട്ടം മൊകേരി നിര്മല ടാക്കീസിന്റെ പിന്നിലെ കൊള്ള് ചാടിക്കേറുന്നത് തുടര്ന്നു ...
ഓടിയ കിതപ്പ് മാറാന് കാത്ത് നില്ക്കാതെ
ഒരു രൂപ അന്പത് പൈസ എടുത്ത് തന്നിട്ട് ഇക്കാക്ക എന്നോട് പറഞ്ഞു
അയ്യെടചാണിന്റെ ഉള്ളില് കൂടി പോയിട്ട് അവസാനം ഒരോട്ട കാണും അയ്യോട്ടെല് കയ്യിട്ടാല് ഓല് ടിക്കറ്റ് തെരും
അതും മാങ്ങി ഇഞ്ഞ് മുബ്ബ്ത്തന്നെ കുത്തിരിഞ് കണ്ടോ
പൈസ വാങ്ങുന്നതിനിടയില് ഞാന് ചോദിച്ചു
അല്ല.. അന്നെരിഞ്ഞ് കാണുന്നില്ലേ
എന്റെ സാരേല്ല ..ഇഞ്ഞ് മുബ്ബ് ക്കുത്തിരിഞ്ഞ്യെന്നെ മരിയാതിക്ക് കണ്ടോ
ഞാന് ബെക്കിലേങ്ങാന് കുത്തിരിഞ്ഞ് കണ്ടോളും
പൈസയും കയ്യില് പിടിച്ച് അതിനുള്ളിലേക്ക് കേറുമ്പോള് ഞാന് ഓര്ത്തു ....
പാവം ഇക്കാക്ക ...
എനക്ക് മുന്നിലത്തെ സീറ്റിന്റെ ടിക്കറ്റും എടുത്ത് തന്ന് ഓന് ബെക്കിലെങ്ങാന് ഇരുന്ന് കാണുന്നു ..
അങ്ങനെ ടിക്കറ്റും എടുത്തുഞാന് ഉള്ളിലേക്ക് കേറി
കയ്യൊന്ന് നീട്ടിയാല് സ്ക്രീനില് തൊടാവുന്ന ദൂരത്തിലുള്ള ബെഞ്ചില് ഇരുന്ന് കൊണ്ട് ആദ്യമായി ടാക്കീസില് ഇരുന്ന് സിനിമ കാണുന്നവന്റെ ഉത്സാഹത്തോടും വെവലാതിയോടും കൂടി ഞാന് സിനിമ കാണാന് തുടങ്ങി ....
ഇടവേളയില് തെളിഞ്ഞ ലൈറ്റിന്റെ വെളിച്ചത്തില് ഞാന് പിന്നിലേക്ക് തിരിഞ്ഞ് നോക്കിയപ്പോള്
ഏറ്റവും ബേക്കിലെ സീറ്റിലിരുന്ന് കൊണ്ട് ഇക്കാക്ക എനിക്ക് നേരെ കൈ പൊക്കി കാണിച്ചു ..
ആദ്യമായി വലിയ സ്ക്രീനില് സിനിമ കാണാന് സാധിച്ചതിന്റെ നിര്വൃതിയില് അതെ ആവെശത്തോടെ ഞാനും അവന് നേരെ കൈ വീശി ..
അന്നവൻ തന്ന ദൈര്യവും പ്രചോദനവും കൈമുതലാക്കി രണ്ടാമത്തെ സിനിമ കാണാൻ ഞാൻ തനിച്ച് പോയപ്പോൾ ഞാനാ സത്യം മനസിലാക്കി
അന്ന്
ഇക്കാക്ക എന്നെ തോൽപ്പിക്കുകയായിരുന്നെന്ന്.,......
അങ്ങനെ ഇക്കാക്കാന്റെ മുന്നിൽ സന്തോഷത്തോടെ തോൽക്കുവാൻ ഈ അനിയന്റെ ജീവിതം പിന്നെയും ബാക്കി ..,:)
No comments:
Post a Comment